Nënkryetari i Mitrovicës, Enis Osmani, ka reaguar ndaj kritikave për gjendjen e Liqenit, duke iu përgjigjur zyrtarëve të PDK-së që kanë ngritur shqetësime lidhur me këtë çështje.
Sipas Osmanit, reagimet e fundit të PDK-së janë të vonuara, pasi, siç thotë ai, kjo parti ka qeverisur për katër vite dhe nuk ka ndarë mjete të mjaftueshme për rregullimin e Liqenit, përfshirë edhe në buxhetin e vitit 2026, i cili është hartuar nga qeverisja e kaluar.
“Gjendja në Liqen është pasqyra më e mirë e mënyrës se si PDK-ja, gjatë katër viteve të fundit, e ka lënë pas dore Mitrovicën në çdo aspekt”, ka deklaruar Osmani.
Postimi i tij:
Eksponentë të PDK-së paskan reaguar për gjendjen në Liqen. Shumë mirë, por çfarë keni bërë për katër vite me radhë dhe sa mjete keni ndarë për Liqenin në buxhetin e vitit 2026, i cili është hartuar nga ju?
Gjendja në Liqen është pasqyra më e mirë e mënyrës se si PDK-ja, gjatë katër viteve të fundit, e ka lënë pas dore Mitrovicën në çdo aspekt.
Për qeverisjen tonë nuk do të ketë nevojë të pritet fundi i mandatit. Qytetarët po e shohin një Mitrovicë ndryshe tashmë pas vetëm gjashtë muajsh, me ide, vullnet, largim të uzurpimeve dhe punë konkrete.
Liqenin do ta adresojmë për në vitin 2027, kur për herë të parë do ta hartojmë vetë buxhetin dhe do të ndajmë mjete konkrete për rregullimin e tij.
