Ali Ahmeti, ka përcjellë një mesazh me rastin e Ditës Ndërkombëtare të Demokracisë, duke vënë theksin te rëndësia e lirisë, pluralizmit, dialogut dhe barazisë në një shoqëri demokratike.
Ahmeti tha se demokracia nuk duhet të shihet vetëm si një sistem institucionesh apo si proces zgjedhor, por si një marrëdhënie e qëndrueshme mes shtetit dhe qytetarit, ku liria, dinjiteti dhe barazia duhet të jenë të panegociueshme.
“Demokracia është, mbi të gjitha, testi më i lartë i pjekurisë politike”, ka shkruar Ahmeti.
Sipas tij, në një shoqëri të karakterizuar nga diversiteti, demokracia nuk kërkon uniformitet, por krijon hapësirë për dallimet dhe i jep pluralizmit dinjitet institucional.
