Pentagoni po përgatit të paktën katër opsione për riorganizimin e pranisë ushtarake amerikane në Evropë, të cilat pritet t’i paraqiten sekretarit amerikan të Mbrojtjes, Pete Hegseth, deri më 6 nëntor.
Siç ka raportuar Reuters, rishikimi mund të çojë edhe në shkurtim të numrit të rreth 80 mijë trupave amerikane të dislokuara në Evropë, megjithëse ende nuk është marrë vendim për një tërheqje apo reduktim konkret.
Procesi është duke u zhvilluar në kuadër të një rishikimi gjashtëmujor të qëndrimit ushtarak amerikan në Evropë.
Një tjetër element i rëndësishëm është se administrata Trump po kërkon që aleatët evropianë të marrin më shumë përgjegjësi për mbrojtjen e Evropës, ndërsa Pentagoni po vlerëson edhe çështje si qasja në baza ushtarake, hapësira ajrore, shpenzimet e mbrojtjes dhe bashkëpunimin me SHBA-në.
Sipas dokumentit të brendshëm të siguruar nga Reuters, gjenerali më i lartë amerikan në Evropë pritet të marrë pjesë deri më 18 shtator në një takim informues me drejtuesin e politikave të Pentagonit, Elbridge Colby. Nga ky proces pritet të dalin alternativat që më pas do t’i paraqiten Sekretarit të Mbrojtjes, Pete Hegseth.
Administrata Trump ka kërkuar prej kohësh që aleatët evropianë të marrin më shumë përgjegjësi për mbrojtjen e kontinentit. Për Uashingtonin, prania amerikane në Evropë duhet të shoqërohet me një angazhim më të madh financiar dhe ushtarak nga vendet e tjera të NATO-s.
Sekretari i Mbrojtjes, Pete Hegseth, ka kritikuar disa prej aleatëve për atë që e konsideron mbështetje të pamjaftueshme ndaj Shteteve të Bashkuara. Nga ana tjetër, Sekretari i Përgjithshëm i NATO-s, Mark Rutte, ka pranuar se shqetësimet amerikane ekzistojnë, por ka theksuar se shumica e vendeve evropiane kanë dhënë mbështetje.
Tashmë Pentagoni do të analizojë përgjigjet dhe kapacitetet e aleatëve, përpara se të përcaktojë skenarët për të ardhmen e trupave amerikane në Evropë
