Vdes foshnja njëvjeçare – Spitali i Pejës del me detaje: Kishte të vjellura e çrregullime të vetëdijes

Një foshnje rreth 1 vjeç e gjysmë ka vdekur në Spitalin e Pejës. Për këtë rast, është deklaruar vetë Spitali i Pejës, nga ku kanë dhënë detaje të reja për vdekjen e fëmijës.

Sipas njoftimit të tyre, L. Gashi fillimisht u pranua në spital në orën 22:15 të datës 5 nëntor 2025 nga mjeku kujdestar, me ankesa për të vjella.

Pas trajtimit të ofruar, gjendja e tij është stabilizuar dhe ai është liruar me rekomandimin që të përcillet nga afër dhe, në rast nevoje, të rikthehet për kontroll shtesë.

Në mëngjesin e datës 6 nëntor 2025, rreth orës 07:00, fëmija është sjell sërish në spital, këtë herë në gjendje të rëndë, me çrregullime të vetëdijes dhe probleme serioze në frymëmarrje.

Menjëherë është trajtuar nga ekipi i mjekëve me oksigjen dhe terapi mbështetëse, por për shkak të përkeqësimit të gjendjes është kryer intubimi nga ekipi i anesteziologëve.

Pavarësisht masave reanimatore të marra me përkushtim dhe sipas protokolleve mjekësore, fatkeqësisht fëmija ka ndërruar jetë në orën 08:50.

Në përputhje me procedurat ligjore dhe protokollet standarde, Spitali i përgjithshëm në Pejë ka njoftuar menjëherë Policinë e Kosovës, në orën 09:13, si edhe organet kompetente për zhvillimin e hetimeve sipas ligjit.