Prishtina, mëngjesin e së mërkurës u kthye në normalitetin e transportit publik.
Trafiku Urban dhe transportuesit privatë nga sot do të operojnë me orar të rregullt, pas alokimit të mjeteve financiare nga Ministria e Financave tek buxheti i Komunës së Prishtinës.
Kështu ka bërë dje të ditur Trafiku Urban.
“Pas fillimit të alokimit të mjeteve nga Ministria e Financave dhe pagesës së faturave nga Komuna e Prishtinës, N.P.K. “Trafiku Urban” SHA ju njofton se nga neser, më datë 03 dhjetor 2025, do të rifillojë ofrimin e shërbimit të transportit publik.
Gjatë ditëve të fundit, ndërprerja e transportit ka qenë e pashmangshme për shkak të pamundësisë financiare të krijuar nga mospagesa e detyrimeve të Komunës ndaj ndërmarrjes.
Shprehim keqardhje të sinqertë për vështirësitë që qytetarët janë detyruar të përballen gjatë këtyre ditëve pa shërbimin e transportit publik dhe ju falënderojmë për mirëkuptimin e treguar”.
