KQZ shpalli rezultatet përfundimtare pa Listën Serbe, OSBE: Të respektohen standardet, po i monitorojmë zhvillimet

Misioni i OSBE-së në Kosovë thotë se po i monitoron nga afër zhvillimet në vend pasi Komisioni Qendror i Zgjedhjeve i shpalli të shtunën rezultatet përfundimtare të zgjedhjeve të parakohshme parlamentare të 28 dhjetorit, duke miratuar listat përbërëse të të gjitha partive, përveç asaj të Listës Serbe.

OSBE është e njoftuar se Lista Serbe ka paraqitur ankesë në Panelin Zgjedhor për Ankesa dhe Parashtresa dhe po pret përgjigje për këtë vendim të KQZ-së.

“Misioni thekson nevojën për respektim të plotë të standardeve ndërkombëtare zgjedhore, në veçanti publikimin transparent dhe gjithëpërfshirës të rezultateve zgjedhore, si një mjet për të siguruar siguri juridike dhe trajtim të barabartë për të gjithë garuesit zgjedhorë”, thuhet në reagimin e OSBE-së.

OSBE-ja thotë se “do të vazhdojë t’i monitorojë nga afër zhvillimet”.