KE: Nuk po punojmë vetëm që t’i japim fund luftës, por edhe për vendosjen e paqes së qëndrueshme në Ukrainë

Komisioni Evropian (KE) deklaroi se vazhdon të punojë jo vetëm për t’i dhënë fund luftës në Ukrainë, por edhe për të siguruar një paqe të drejtë dhe të qëndrueshme.

Zëdhënësja e KE-së, Paula Pinho, iu përgjigj pyetjeve të gazetarëve në konferencën e përditshme për shtyp.

Kur u pyet për dëshirën e Presidentit të SHBA-së, Donald Trump, për të përfunduar një marrëveshje paqeje “deri në Krishtlindje”, Pinho bëri vlerësimin se “Të gjithë e duam këtë dhe nuk po mjaftohemi vetëm në urimin e kësaj. Ne të gjithë po ndërmarrim hapa shumë konkretë për t’i dhënë fund kësaj lufte të tmerrshme, e cila ka vazhduar për kaq shumë kohë që kur filloi. Pra, sa më shpejt të përfundojë, aq më mirë”.

Pinho vuri në dukje se negociatat për një marrëveshje paqeje janë duke vazhduar, duke shtuar se përfaqësuesit e BE-së po zhvillojnë bisedime me Ukrainën dhe SHBA-në dhe se perspektiva e BE-së po merret gjithashtu në konsideratë në këto bisedime.

Pinho deklaroi se Ukraina beson se BE-ja dhe SHBA-ja ndajnë një interes të përbashkët për t’i dhënë fund kësaj lufte, duke shtuar se “Qëllimi ynë nuk është vetëm t’i japim fund luftës, por edhe të vendosim një paqe vërtet të drejtë dhe të qëndrueshme dhe ne po punojmë jashtëzakonisht në mënyrë aktive për të arritur këtë qëllim”.