IPK ka rekomanduar suspendimin e një zyrtari policor në Prishtinë, i cili dyshohet për përfshirje në veprën penale “ndihmë në kryerjen e veprës penale”.
Hetimet janë nisur fillimisht nga Policia e Kosovës dhe më pas është përfshirë edhe IPK.
Rasti po trajtohet në procedurë të rregullt në koordinim me prokurorinë.
Komunikatë për media:
IPK rekomandoi suspendimin për një zyrtar policor në Prishtinë
Prishtinë, 23 prill 2026
Inspektorati Policor i Kosovës respektivisht hetuesit e Departamentit të Hetimeve i kanë rekomanduar mbrëmë Policisë së Kosovës suspendimin e një zyrtari policor i angazhuar në Njësinë e Komunikacionit Rrugor, Drejtoria Rajonale e Policisë në Prishtinë.
Fillimisht hetimet lidhur me këtë rast janë filluar nga Policia e Kosovës kurse pas dyshimeve për përfshirjen si të dyshuar edhe të një zyrtari policor, bazuar në fushëveprimin ligjor janë njoftuar edhe hetuesit e IPK-së.
Hetimet ndaj zyrtarit policor janë duke u zhvilluar në drejtim të veprës penale “Ndihma në kryerjen e veprës penale” kurse pas konsultave me prokurorinë rasti do të trajtohet në procedurë të rregullt.
Hetuesit e IPK-së në konsultim të vazhdueshëm me prokurorin përgjegjës pritet të ndërmarrin edhe veprime të tjera hetimore lidhur me këtë rast për të sqaruar rrethanat e këtij rasti.
