E trishtë në Shqipëri: Dy oficerët e policisë dyshohet se pësuan sulm në zemër

Dy oficerë policie kanë ndërruar jetë në burgun 313 në Shqipëri, njëri pas tjetrit.

Siç raporton Top Channel , fillimisht dyshohet se nga sulmi në zemër ka ndërruar jetë Zog Muhametaj dhe më pas në mesnatë Pëllumb Vrana.

Zog Muhametaj 62 vjeç lindur e banues në Tropojë, ka filluar për herë të parë në burgje më 2015 dhe në 2023 ka filluar në burgun Jordan Misja në Tiranë ku dhe shërben si specialist informacioni me gradën Komisar.

Rreth orës 21.36 minuta të mbrëmjes kur po ndërrohej turni ka qenë duke bërë instruktazhin e stafit që do merrte shërbimin dhe nga pyetja e dëshmitarëve atij i ka rënë të fikët. Është thirrur mjekja dhe infermierja e IEVP për 3 minuta dhe ka konstatuar që ka qenë pa puls, pra pa shenja jete. Menjëherë është dërguar urgjent me autoambulancë për në Spitalin Ushtarak duke e shoqëruar edhe infermieria e burgut.

Atje është tentuar për ta kthyer në jetë por fatkeqësisht nuk është bërë e mundur, ndërkohë janë dokumentuar me anë të kamerave të gjitha veprimet e stafit në IEVP.

Pas kësaj, sipas TCh kur po kryheshin veprimet hetimore, Pëllumb Vrana, me detyrë teknik i kamerave, 62 vjeç, banues në Tiranë, në orën 24:00 gjendej në zyrën e Drejtorit të institucionit dhe po këqyrte kamerat bashkë me Drejtorin e Policisë, Shefin e Sektorit të SHKB dhe Shefin e Sektorit të Kamerave në Drejtorinë e Policisë.

Kanë qenë duke shikuar kamerat në zyrë dhe, në një moment, Pëllumbit i ka rënë të fikët, i është dhënë menjëherë ndihma nga të pranishmit dhe infermierja e institucionit dhe, pasi i ka ardhur pulsi, është dërguar menjëherë me ambulancën e institucionit te Urgjenca e QSUT dhe aty, rreth orës 01:00, ka humbur jetën.