Demiri akuzon Duda Baljen për manipulim, kjo e fundit i kundërpergjigjet LIVE

Rasim Demiri nga Koalicija VAKAT gjatë intervistës në studion e “Kosova Live”, deklaroi se kandidimi i Ena Kadaj Krasniqi për deputete, çuditërisht po i pengon vetëm Duda Baljes, duke ngritur dyshime për motive personale dhe politike.

“Kandidimi i Enës nuk po i pengon askujt tjetër, përveç Dudës. Kjo është e pakuptimtë dhe e dyshimtë”, tha Demiri.

Në debat u përfshi live edhe Duda Balje, e cila i mohoi akuzat dhe reagoi ashpër ndaj pretendimeve.

“Unë nuk e di çka janë duke tentuar me bo. Zonja Ena vetë ka deklaruar se është shqiptare. Tash na me zor duhet me shti këtë grua me u bo boshnjake a? Ka deklarata publike dhe me shkrim. Ka qenë edhe në listën e AAK-së, ku vetë ka shkruar për veten se është shqiptare. Cili është qëllimi? Cili është plani me e bo me zor boshnjake?”, deklaroi Balje.

Ajo theksoi se përkatësia e njërit prind nuk e përcakton automatikisht nacionalitetin e një personi.

“Përkatësia e njërit prej prindërve nuk e cakton nacionalitetin. Ajo vetë e ka deklaruar veten shqiptare”, shtoi Balje. Rasim Demiri kërkoi prova konkrete për këto pretendime:

“Ku e ka deklaruar dhe kur? Hajde le të na tregojë me fakte.”

Balje u kundërpërgjigj duke thënë se deklarimi është bërë në KQZ, në momentin e dorëzimit të listës për Asamblenë Komunale.

“Në KQZ, kur e ka plotësuar listën për Asamblenë Komunale”, tha Balje.

Demiri vazhdoi duke kërkuar fakte, ndërsa Balje përfundoi se vendimi tashmë është marrë nga institucionet.

“S’kam çfarë. PZAP dje dhe KQZ kanë marrë vendim dhe besoj se edhe sistemi i drejtësisë do të marrë të njëjtin vendim. Ajo nuk është më në listë”, tha Balje.

Ndiqeni debatin e plotë në videon poshtë: