Aksident i rëndë në Gjermani: Vdesin dy gra, dyshohet se janë nga Kosova

Dy gra kanë vdekur si pasojë e një aksidenti në Gjermani, në autostradën A5 pranë Appenweierit.

Lidhur me rastin kanë shkruar edhe mediat gjermane, derisa një medium lokal në Kosovë ka raportuar se bëhet fjalë për E.Z. 24 vjecare dhe A.Z 18-vjeçare, nga fshati Topanicë e Kamenicës.

Sipas raportimeve të mediave gjermane dhe policisë, aksidenti fillimisht u shkaktua nga një përplasje mes dy automjeteve gjatë një ndërrimi korsie me shpejtësi të lartë.

Si pasojë, automjetet mbetën të ndaluara në rrugë, duke detyruar drejtuesit e tjerë të frenonin papritur.

Më pas ndodhi një aksident zinxhiror ku u përfshinë gjithsej pesë automjete të tjera.

Një person tjetër u raportua i plagosur rëndë, ndërsa dëmi material vlerësohet të jetë mbi 100 mijë euro.

Autostrada A5 në drejtim të Karlsruhes u mbyll për disa orë, ndërsa ekipet e emergjencës, zjarrfikësit dhe policia zhvilluan operacionet e shpëtimit dhe hetimet për zbardhjen e plotë të shkaqeve të aksidentit.