Zhegrova i pakënaqur te Juventusi, e ardhmja e tij mund të marrë një kthesë të papritur në janar

Edon Zhegrova është i pakënaqur me minutat e lojës te Juventusi dhe dëshiron të ketë një rol më të madh në skuadër nën drejtimin e Luciano Spallettit.

Sipas Fabrizio Romanos, anësori i Kosovës mendon se ka dëshmuar se mund ta ndihmojë ekipin kur aktivizohet nga stoli. Tani ai shpreson të nisë ndeshjet si titullar, në vend që të hyjë në fushë vetëm në minutat e fundit.

Statistikat e shpjegojnë pakënaqësinë e tij. Zhegrova ka bërë nëntë paraqitje në Serie A këtë sezon dhe të gjitha kanë qenë si zëvendësues, duke grumbulluar gjithsej 249 minuta.

Që prej transferimit të tij nga Lille në Torino, para një viti e gjysmë, futbollisti kosovar ende nuk e ka nisur asnjë ndeshje të kampionatit italian si titullar.

Ndikimi i tij në ato pak minuta që ka marrë është argumenti kryesor për kërkesën e më shumë hapësirës, pasi këtë sezon ka regjistruar dy gola dhe dy asistime në Serie A.

Paraqitjen më të mirë si zëvendësues e pati më 1 nëntor kundër Napolit, kur asistoi për Kerim Alajbegovicin në golin e parë të fitores 2-0 në Allianz Stadium.

Zhegrova la gjurmë edhe të dielën, kur u aktivizua nga stoli në ndeshjen ndaj Fiorentinës dhe harkoi një top për Douglas Luizin, i cili shënoi me kokë në barazimin 2-2.

Romano raporton se kjo situatë është një çështje që duhet përcjellë me vëmendje përpara afatit kalimtar të janarit, pasi e ardhmja e anësorit mund të vihet në pikëpyetje nëse roli i tij nuk ndryshon.

Ndërkohë, mediumi TuttoJuve shkon edhe më tej, duke raportuar se Juventusi mund ta nxjerrë Zhegrovën sërish në treg gjatë janarit dhe të dëgjojë ofertat e favorshme, në kuadër të përpjekjeve për të zvogëluar numrin e lojtarëve në skuadër.

Për momentin, Zhegrova është i grumbulluar me Kosovën për ndeshjet e muajit nëntor, ku “Dardanët” do të përballen me Izraelin të shtunën dhe Irlandën të martën.