Presidenti i FIFA-s, Gianni Infantino, ka shmangur pyetjet për të ardhmen e tij në krye të institucionit të futbollit botëror, duke zgjedhur të bëjë shaka me pamjen e një gazetari në vend që t’u përgjigjej akuzave që lidhen me një plan të diskutueshëm për shitjen e aksioneve në Kupën e Botës.
Sipas “Daily Mail”, Infantino u pyet nëse kishte tradhtuar interesat e futbollit dhe nëse po mendonte të jepte dorëheqjen, por nuk dha një përgjigje të drejtpërdrejtë.
Gazetari i “Sky News”, James Matthews, e pyeti pse nuk po largohej nga posti, ndërsa Infantino iu përgjigj me ironi:
“Prerja e flokëve të shkon shumë. Faleminderit. Shihemi te berberi.”
Si Infantino, ashtu edhe gazetari janë tullacë, detaj që e bëri edhe më të dukshme natyrën tallëse të përgjigjes.
Polemika për planin e shitjes së aksioneve në Kupën e Botës
Debati lidhet me raportimet e publikuara në korrik, sipas të cilave Infantino po shqyrtonte mundësinë e shitjes së një pjese të interesave ekonomike të Kupës së Botës te investitorë privatë.
Sipas “The Times”, projekti parashikonte krijimin e një kompanie të re dhe mund të arrinte një vlerë prej më shumë se 15 miliardë paundësh.
Raportimi pretendonte gjithashtu se Infantino mund të merrte një rol të rëndësishëm në këtë strukturë pasi mandati i tij në FIFA të përfundonte në vitin 2031, me të ardhura potencialisht shumë të larta.
Sipas të njëjtave raportime, në diskutime ishin përfshirë drejtues të lartë të FIFA-s dhe investitorë të mundshëm.
Mes emrave të përmendur ishte edhe Joshua Kushner, vëllai i Jared Kushner, dhëndrit të presidentit amerikan Donald Trump.
