Tjetër rast shpëtimi nga rrjeti i tuneleve të hidrocentraleve në zonën e Himalajeve në Nepal, të bllokuara nga vërshimi masiv i baltës më 26 gusht.
Ky shtetas kinez, Lu Haitao, u nxor i gjallë nga ekipet e shpëtimit pasi qëndroi 10 ditë i bllokuar në tunele. Ai është i treti që nxirret i gjallë, pas dy punëtorëve të tjerë një ditë më parë. Ndërkohë, autoritetet shpëtuan gjithashtu një grua nga shtëpia e saj në zonat e banuara të goditura nga katastrofa apokaliptike.
Për operacionet e shpëtimit, veçanërisht në rrjetin e tuneleve të hidrocentraleve, po përdoren edhe helikopterë ushtarakë.
Bilanci i katastrofës mbetet dramatik. Më shumë se 1,340 persona kanë humbur jetën në Nepal dhe Tibet, si pasojë e copëtimit të akullnajave që shkaktuan vërshime të furishme ujërash e balte nga majat drejt zonave më të ulëta malore.
Më shumë se 4,800 të tjerë rezultojnë ende të zhdukur. Autoritetet vlerësojnë se rreth 900 punëtorë mbeten të bllokuar në tunelet e hidrocentraleve përgjatë lumit Trishuli. Operacionet e kërkimit po vazhdojnë mes kushteve jashtëzakonisht të vështira
