Besfort Lamallari shkarkohet nga posti i ministrit të Brendshëm

Besfort Lamallari është shkarkuar nga detyra e ministrit të Punëve të Brendshme të Shqipërisë, post të cilin e mbante që nga marsi i vitit 2026. Ai ishte emëruar në këtë detyrë me dekret të presidentit Bajram Begaj më 4 mars 2026.

Më herët, Lamallari kishte drejtuar Ministrinë e Drejtësisë nga shtatori i vitit 2025 deri në mars të vitit 2026. Ndërsa nga tetori i vitit 2017 kishte shërbyer si zëvendësministër i Brendshëm.

Gjatë karrierës së tij në administratën publike, Lamallari është angazhuar në fushën e sigurisë, drejtësisë dhe luftës kundër krimit të organizuar. Që nga viti 2020, ai ka përfaqësuar Shqipërinë si negociator përgjegjës për Kapitullin 24, “Drejtësia, Liria dhe Siguria”, në kuadër të negociatave me Bashkimin Evropian.

Ai ka qenë gjithashtu i angazhuar në menaxhimin e situatave emergjente, përfshirë operacionet e kërkim-shpëtimit pas tërmetit të vitit 2019 në Durrës dhe menaxhimin e situatës së COVID-19 në qarkun e Shkodrës.

Lamallari ka lindur më 18 korrik 1987 në Peshkopi. Ka përfunduar studimet për Drejtësi në Universitetin e Tiranës, ndërsa në vitin 2013 është diplomuar në Universitetin e Oksfordit me master në Kriminologji dhe Drejtësi Penale. Ai ka kryer gjithashtu studime pasuniversitare në Itali në fushën e bashkëpunimit ndërkombëtar kundër krimit të organizuar transnacional.

Përveç angazhimeve në administratë, Lamallari ka pasur edhe veprimtari akademike dhe kërkimore, me fokus te krimi i organizuar, radikalizimi dhe terrorizmi.