Në një intervistë për Publika Podcast “Kosovo Talks”, Lisandri Dragoj, Drejtori i Përgjithshëm i Wolt për Kosovë dhe Shqipëri, foli për rritjen e shpejtë të platformës në tregun kosovar dheshqiptar, duke e cilësuar Ballkanin Perëndimor si një rajon “tejet të etur për teknologji dhe risi të reja”.
Sipas tij, qasja ndaj Wolt ka qenë jashtëzakonisht pozitive që nga dita e parë, si nga konsumatorët ashtu edhe nga bizneset lokale. Ai kujtoi se në fillimet e operimit, kërkesa e bizneseve për t’u bërë pjesë e platformës ishte aq e lartë, sa ekipi nuk arrinte ta përballonte ritmin e regjistrimeve dhe onboardimit.
“ Sot kemi rreth 1000 biznese të regjistruara në Kosovë dhe numri vazhdon të rritet çdo muaj. Mbi 150 biznese të reja regjistrohen vazhdimisht dhe edhe numri i klientëve është në rritje. Ekosistemi po funksionon siç duhet ”, tha Dragoj.
Ai theksoi se për bizneset nuk ka asnjë kosto hyrëse për t’u bërë pjesë e platformës Wolt, pasi çdo proces mbulohet nga kompania, duke filluar nga regjistrimi deri te integrimi në platformë.
“ Ka vetëm përfitime. Shumica e bizneseve që janë pjesë e platformës i kanë tejkaluar pritshmëritë e tyre. Ka pasur raste kur shitjet janë shumëfishuar ”, deklaroi ai.
Dragoj ndau edhe historinë e një biznesi të vogël fast-food që ishte pranë mbylljes për shkak të kostove operative, por pas hyrjes në Wolt, shitjet iu rritën pesëfish.
“ Ishte duke e mbyllur biznesin. U bë pjesë e platformës dhe niveli i shitjeve u pesëfishua. Sa më shpejt të bëhesh pjesë e platformës, aq më mirë është për biznesin afatgjatë ”, tha ai, duke e përshkruar Wolt si “ një mini-qendër tregtare dixhitale që e mban në xhep ”.
Në intervistë, Dragoj foli edhe për ndikimin e teknologjisë në jetën e përditshme dhe mënyrën se si Wolt po lidh njerëzit përtej distancave. Ai kujtoi rastin e një emigranti shqiptar në Gjermani, i cili përmes Wolt bënte pazarin javor për nënën e tij në Shqipëri.