Një 25-vjeçar shqiptar, banues në Torino, është vrarë me armë zjarri në orët e para të mëngjesit të së dielës në Baldissero d’Alba, në provincën e Cuneos, Itali.
Ngjarja ndodhi rreth orës 02:00, në një banesë në rikonstruksion, ku pronari, një 35-vjeçar italian, dyshohet se ka hasur një grup prej të paktën pesë personash në oborrin e shtëpisë.
Sipas rindërtimit paraprak të autoriteteve italiane, pronari ka dëgjuar zhurma jashtë banesës dhe ka dalë për të parë se çfarë po ndodhte. Ai ka marrë një pistoletë, të cilën e posedonte në mënyrë të ligjshme, dhe ka qëlluar disa herë në drejtim të grupit.
Një prej plumbave ka goditur 25-vjeçarin shqiptar, i cili ka mbetur i plagosur rëndë. Në vendngjarje mbërritën menjëherë ekipet e emergjencës, por pavarësisht përpjekjeve për ta shpëtuar, i riu ndërroi jetë.
Pas të shtënave, pjesëtarët e tjerë të grupit janë larguar nga vendi i ngjarjes, ndërsa pronari ka njoftuar karabinierët dhe shërbimet e emergjencës.
Viktima është identifikuar si një i ri me origjinë shqiptare, rezident në Torino. Sipas informacioneve të publikuara nga mediat italiane, ai kishte precedentë penalë. Autoritetet po punojnë për identifikimin dhe lokalizimin e personave të tjerë që dyshohet se ndodheshin në grup.
