Raportuesi për Kosovën në Parlamentin Evropian, Riho Terras, ka thënë se vendi ka humbur një vit të tërë me një gjendje të përhershme të zgjedhjeve e fushatave dhe kjo gjendje ka ndikuar në të gjitha proceset që e çojnë këtë vend drejt Bashkimit Evropian.
Këto komente, Terras i bëri në një intervistë për Info Magazine në Klan Kosova.
Ai shtoi se këshilla e tij është që të ketë sa më parë qeveri për të nisur punën rreth reformave.
“Këshilla ime e parë është që sa më shpejt të jetë e mundur të gjendet udha për të bërë një koalicion qeveritar i cili do të jetë në gjendje që të veprojë shpejt dhe të nisin me të gjitha reformat që janë planifikuar. Por pikë së pari çështja më e rëndësishme është që të ketë një qeveri funksionale”, deklaroi Terras.
Eurodeputeti shpreson që të gjitha partitë politike t’i lënë anash diferencat e tyre dhe të mundohen të gjejnë emëruesin e përbashkët për të krijuar një qeveri të fortë dhe funksionale.
Edhe përkundër bllokadave politike në vend viteve të fundit, Terras është i mendimit se Kosova akoma është në rrugë të mirë drejt Bashkimit Evropian.
Ai thotë se ishin parlamentarët evropianë ata që e shtynë komisioneren për zgjerim, Marta Kos, që ta vizitojë Kosovë.
“Tani, çdo person i rëndësishëm i institucioneve evropiane e ka vizituar Kosovën dhe porosia ishte e njëjta: të gjithë mendojnë që Kosova është në një rrugë të mirë dhe se një qeveri funksionale duhet të jetë aty. Kjo për të pasur një partner për të negociuar dhe të ketë një partner për statusin e vendit kandidat për Kosovën dhe të çelen bisedimet e pranimit në Union”, deklaroi Terras në Info Magazine.
Riho Terras tha më tej se sfida e vetme dhe më e madhe për BE-në, në kontekst të hapjes së bisedimeve me Kosovën për anëtarësim, është që pesë shtete anëtare të Unionit nuk e njohin Kosovën deri tani.