Gjatë emisionit të mbrëmshëm, ku po diskutohej për votimin në Mitrovicë, analisti Parim Olluri është përfshirë në debat me deputetin Nezir Kraki.
Pas debatit, ka reaguar ministrja në detyrë e Punëve të Jashtme, Donika Gërvalla-Schwarz, e cila në një postim në rrjetet sociale ka përdorur gjuhë të ashpër ndaj Televizionit 7, moderatorit të emisionit dhe analistit.
“Televizion rrugaç… Moderator rrugaç. ‘Analist’ mercenar rrugaç. Por me prof. Nezir Krakin kot e keni. As nuk mateni e as nuk ia dilni dot. Në mes të llumit tuaj shkëlqen dija dhe dinjiteti i tij. Marre ju koftë!”, ka shkruar Gërvalla.
Reagimi i saj është kundërshtuar nga nënkryetarja e PDK-së, Vlora Çitaku, e cila e ka cilësuar gjuhën e përdorur nga Gërvalla si të papranueshme për një zyrtare publike dhe ka theksuar se një sjellje e tillë rrezikon raportet me median dhe vetë demokracinë.
Postimi i plotë i Çitakut:
“E veshur me pushtet politik, ish Zëvendëskryeministre dhe Ministre e Punëve të Jashtme, sot e propozuar për Ministre të Drejtësisë, ajo përdor një gjuhë të papranueshme ndaj mediave, gazetarëve dhe analistëve në studio. Kjo sjellje tregon mungesë të thellë kuptimi për rolin, funksionin dhe përgjegjësinë që bart një njeri i veshur me pushtet. Fjala publike është arma më e fortë e një politikani, dhe kur ajo keqpërdoret për të goditur pa mëshirë median dhe gazetarët, bëhet jo vetëm e papranueshme, por edhe e rrezikshme për vetë demokracinë. Nën panikun e aktakuzave për korrupsion dhe manipulimeve me vota në Mitrovicë, ata kanë humbur çdo kontroll dhe çdo ndjenjë përgjegjësie.” , shkroi ajo në Facebook, përcjell Insajderi.
