Kryetari i Drenasit, Ramiz Lladrovci, ka shprehur publikisht mbështetjen e tij për kandidatin e PDK-së për deputet, Enver Hoxhaj, në prag të zgjedhjeve të 7 Qershorit.
Përmes një postimi në rrjetet sociale, Lladrovci ka ftuar qytetarët që ta votojnë Enver Hoxhajn me numrin 10, duke vlerësuar lart angazhimin e tij ndër vite në institucionet më të rëndësishme të shtetit. “Mikun tim Enverin, sikur deri më tash, ia ofroj përkrahjen e plotë për zgjedhjet e 7 Qershorit. Ftoj po ashtu qytetarët ta votojnë dhjetëshin e PDK-së”, ka shkruar Lladrovci.
Ai ka përmendur rolet që Hoxhaj ka ushtruar ndër vite, si profesor, diplomat, deputet, ministër, zëvendëskryeministër dhe ushtrues detyre i kryetarit të PDK-së, duke thënë se të gjitha i ka kryer “me nder, përgjegjësi dhe kompetencë”. Lladrovci ka theksuar gjithashtu se njohja e thellë e diplomacisë dhe çështjeve ndërkombëtare nga ana e Hoxhajt, si dhe kreativiteti për të ofruar zgjidhje për Kosovën, janë arsye pse ai e mbështet kandidaturën e tij.
Postimi është shoqëruar edhe me një fotografi të përbashkët të Ramiz Lladrovcit dhe Enver Hoxhajt, në kuadër të fushatës zgjedhore të PDK-së për zgjedhjet e 7 Qershorit.
