Ramadani: Jemi të hapur të takohemi me Kurtin, por në prani të kamerave

Aleanca është e hapur për një takim me kryeministrin në detyrë, Albin Kurti, por kërkon që një takim i tillë të jetë publik dhe në prani të kamerave.

Kështu ka deklaruar deputeti i Aleancës, Burim Ramadani, në emisionin “Info Magazine” në Klan Kosova, duke thënë se partia e tij nuk e ka refuzuar asnjëherë takimin me Kurtin, por e konsideron të panevojshëm një takim vetëm për fotografi apo për qëllime politike.

Ne asnjëherë nuk e kemi refuzuar takimin me zotri Kurtin, ne vetëm kemi thënë nuk është i nevojshëm, pra pse duhet të ketë takim për foto derisa nuk ka pranim të pikave ose ofertës sonë. Për më shumë kryetari Gjini ka shkuar edhe pesë hapa përpara, pra ka pranuar takim me zotri Kurti në prani të kamerave. Pra ta sheh i gjithë populli sepse ne s’kemi fare asnjë pikë, asnjë presje që të fshehim, nuk po duam të jemi në qeveri, s’duam ministra, s’duam zëvendës ministra, zëvendës kryeministra, asgjë nga pushteti, prandaj jemi të hapur, zotri Gjini është i hapur që takimi të ndodhë në prani të kamerave. Pra mundem me thënë nëse e formulojmë ndryshe Ardian Gjini e ka pranuar takimin me Albin Kurtin, por ai takim le të jetë publik, le të jetë transparent”, ka deklaruar Ramadani.

Ai tha se Aleanca nuk e konteston fitoren e Lëvizjes Vetëvendosje në zgjedhjet e 7 qershorit dhe as të drejtën e saj për ta pasur kryetarin e Kuvendit dhe për të formuar Qeverinë.

Megjithatë, për mbështetjen e kuorumit, Aleanca ka kërkuar zotimin për gjashtë vendime që i konsideron strategjike për shtetin, përfshirë çështje që lidhen me energjinë.

Ai kritikoi Vetëvendosjen dhe Kurtin, duke pretenduar se bllokimi i institucioneve po përdoret si alibi për ta çuar vendin në zgjedhje të reja.