Një person është arrestuar në Prishtinë pasi dyshohet se ka publikuar në rrjete sociale një video-incizim duke shtënë me armë zjarri.
Sipas Policisë së Kosovës, rasti është raportuar më 13 gusht 2026. Pas informatës, njësitë policore kanë dalë në vendin e ngjarjes, ku kanë gjetur dhe sekuestruar katër gëzhoja.
Ndërkaq, nga i dyshuari, shtetas kosovar, është sekuestruar një armë me gaz dhe 13 fishekë.
Me vendim të prokurorit, i dyshuari është liruar dhe rasti do të procedohet në procedurë të rregullt.
“Prishtinë / 13.08.2026 – NN. Është arrestuar i dyshuari mashkull kosovar, pasi që i njëjti në rrjete sociale ka publikuar një video incizim duke shtënë me armë zjarri. Njësiti policor ka dalë në vendin e ngjarjes ku ka gjetur dhe sekuestruar 4 gëzhoja, ndërsa nga i dyshuari ka sekuestruar një armë me gaz dhe 13 fishekë. Me vendim të prokurorit i dyshuari lirohet në procedurë të rregullt”.
