Policia e Kosovës ka sqaruar se më 8 shtator 2026 është ndaluar hyrja-dalja dhe parkimi i automjeteve në hapësirat e parkingjeve të Kuvendit të Kosovës dhe Presidencës, me përjashtim të veturave zyrtare të këtyre institucioneve.
Sipas Policisë, kërkesa është bërë nga Drejtoria e Shërbimeve Teknike të Kuvendit, e cila përmes një shkrese zyrtare ka kërkuar që gjatë kësaj dite të mos lejohen automjete në parkingjet e ndërtesave.
Arsyetimi i dhënë për këtë masë është pastrimi i oborrit dhe hapësirave të parkingjeve me mekanizëm adekuat, në të gjitha hyrje-daljet dhe parkingjet e objekteve.
Njoftimi:
NJOFTIM PËR MEDIA
Prishtinë, 08 shtator 2026
Policia e Kosovës (PK), pas pranimit të disa kërkesave/pyetjeve nga mediume të ndryshme dhe me qëllim të informimit të drejt të mediave dhe opinionit të gjerë, përmes kësaj komunikate zyrtare bënë publike informacionet lidhur me hyrje-daljet dhe parkimin e veturave në Kuvendin e Republikës së Kosovës dhe Presidencës.
Zyrtarë kompetent nga Drejtoria e Shërbimeve Teknike të Kuvendit të Republikës së Kosovës, përmes shkresës zyrtare kanë njoftuar dhe njëherit kërkuar nga Policia e Kosovës, që me datën 08.09.2026, përveç veturave zyrtare të Kuvendit dhe Zyrës së Presidentes së Kosovës, të mos lejohen Hyrje-Daljet në vend parkingjet e ndërtesës të asnjë automjeti.
Arsyeja e kësaj ndalese për datën 08.09.2026, sipas kërkesës zyrtare ishte pastrimi i oborrit dhe vend parkingjeve me mekanizëm adekuat, në të gjitha hyrjet – daljet dhe parkingjet e objekteve, përderisa ditëve në vijim shkresa parasheh kthimin e procedurave të rregullta të hyrje-daljeve dhe parkimit për personat e autorizuar.
Policia e Kosovës, është institucion i zbatimit të ligjit dhe të gjitha veprimet e saja i ndërmerr konform autorizimeve ligjore dhe kushtetuese, përfshirë edhe në rastin e zbatimit të kërkesave zyrtare të institucioneve të RKS-së.
