Policia e Kosovës ka reaguar ndaj raportimeve në disa portale se Kosova po “blindohet” në prag të vendimit të Hagës më 16 shtator.
Policia ka sqaruar se planifikimi dhe ndërmarrja e masave të sigurisë në raste të zhvillimeve apo aktiviteteve me pjesëmarrje të madhe të qytetarëve janë pjesë e procedurave të rregullta policore.
Sipas Policisë, masat kanë për qëllim menaxhimin e sigurt të tubimeve, ruajtjen e rendit dhe sigurisë publike, menaxhimin e trafikut dhe garantimin e mbarëvajtjes së aktiviteteve.
Policia ka bërë të ditur se gjatë vlerësimeve merret parasysh edhe mundësia që individë apo elemente të caktuara, përfshirë nga jashtë vendit, të tentojnë të shfrytëzojnë grumbullimet e mëdha për provokime apo incidente.
“Policia e Kosovës u bën thirrje qytetarëve dhe mediave që të mbështeten vetëm në informacionet zyrtare dhe të shmangin përhapjen e pretendimeve të pakonfirmuara”, thuhet në njoftim.
