Pal Lekaj, ka kritikuar Qeverinë e Kosovës, duke e akuzuar se me politikat e saj po e dëmton ekonominë dhe prodhimin vendor.
Sipas Lekajt, mentaliteti qeverisës i kryeministrit Albin Kurti dhe vartësve të tij po krijon pasiguri për bizneset, në vend që t’i mbështesë prodhuesit vendorë dhe punëtorët.
Postimi i tij:
Kur një qeveri lufton prodhuesit, humb gjithë shteti.
Mentaliteti qeverisës i Albin Kurtit dhe vartësve të tij po e ngulfat ekonominë e Kosovës. Në vend që të mbështesin bizneset vendore, prodhuesit dhe punëtorët, po krijojnë klimë pasigurie dhe presioni.
Rasti i qumështores Vita është një shembull i qartë. Në vend që të mbrohet një nga prodhuesit më të njohur vendorë dhe vendet e punës që ai mban, po krijohet një atmosferë që dëmton besimin e investitorëve dhe godet ekonominë vendore.
Kur goditet prodhimi vendor, nuk humb vetëm një kompani. Humbin punëtorët, fermerët, familjet e tyre dhe në fund humbet e gjithë Kosova.
Kosova ka nevojë për një qeveri që i qëndron pranë sektorit privat, e mbron prodhimin vendor dhe krijon kushte për zhvillim ekonomik, jo për politika që e zbehin shpresën dhe e shtyjnë vendin drejt stagnimit.
