OBSH alarmon për valë të re të nxehtit në Evropë: Priten javë me rrezik të lartë për jetën

Organizata Botërore e Shëndetësisë ka paralajmëruar se Evropa mund të përballet me një valë tjetër intensive të të nxehtit, e cila mund të sjellë pasoja të rënda shëndetësore.

Sipas OBSH-së, temperaturat në disa zona të Evropës pritet të arrijnë deri në 43 gradë Celsius, veçanërisht në Portugali dhe Spanjën jugore.

Drejtori Rajonal i OBSH-së për Evropën, Hans Kluge, ka bërë thirrje që shtetet të përgatiten më mirë për përballimin e temperaturave ekstreme, duke theksuar nevojën për plane konkrete për mbrojtjen e grupeve më të rrezikuara.

Vala e të nxehtit e muajit qershor ishte ndër më të rëndat e regjistruara në Evropë, duke shkaktuar probleme në infrastrukturë, energji dhe sisteme shëndetësore. Në disa vende janë raportuar mijëra vdekje shtesë të lidhura me temperaturat ekstreme.

OBSH thekson se të moshuarit, personat pa strehim dhe grupet e tjera të cenueshme mbeten më të ekspozuara ndaj rrezikut nga nxehtësia ekstreme.