Instituti Hidrometeorologjik i Kosovës (IHMK) ka njoftuar se gjatëfundjavës në Kosovë pritet të mbajë mot kryesisht me diell dhe me vranësira të pakta, kryesisht në zonat malore.
Sipas parashikimit të IHMK-së, të shtunën, më 15 gusht, temperaturat minimale do të lëvizin nga 10 deri në 14 gradë Celsius, ndërsa maksimalet pritet të arrijnë nga 28 deri në 32 gradë Celsius.
Era do të fryjë e lehtë deri mesatare, kryesisht nga veriu dhe verilindja, me shpejtësi prej 1 deri në 6 metra për sekondë.
Edhe e diela, më 16 gusht, pritet të jetë kryesisht me diell, me pak vranësira rreth relievit malor.
Temperaturat minimale do të jenë nga 10 deri në 14 gradë Celsius, ndërsa ato maksimale do të arrijnë deri në 33 gradë Celsius.
IHMK ka bërë të ditur se kushtet biometeorologjike do të jenë përgjithësisht të favorshme, por gjatë orëve të mesditës mund të ketë ngarkesë të shtuar termike për shkak të temperaturave të larta.
“Gjatë orëve të mesditës, për shkak të temperaturave që mund të arrijnë deri në 33°C, mund të ketë ngarkesë të shtuar termike”, thuhet në njoftim.
Sa i përket kushteve agrometeorologjike, ato pritet të jenë të favorshme për zhvillimin dhe pjekjen e kulturave bujqësore.
Megjithatë, temperaturat e larta dhe moti i thatë do të rrisin nevojat për ujë të kulturave bujqësore, veçanërisht të perimeve, misrit dhe pemëve frutore.
