Në lokacionin e njohur si “Varrezat e besimtarëve myslimanë”, brenda hapësirës së varrezave të qytetit të Mitrovicës së Veriut, janë gjetur dhe zhvarrosur mbetje mortore që mund t’u përkasin viktimave të luftës në Kosovë.
Sipas njoftimit të Komisionit Qeveritar për Persona të Zhdukur (KQPZH), gërmimet vlerësuese janë realizuar më 27 tetor 2026, në kuadër të angazhimeve institucionale për ndriçimin e fatit dhe vendndodhjes së personave të zhdukur me dhunë gjatë luftës.
Aktivitetet janë realizuar me mbështetjen e Komisionit Qeveritar për Persona të Zhdukur dhe Drejtorisë së Policisë për Hetimin e Krimeve të Luftës (DHKL), përkatësisht Sektorit për Personat e Zhdukur, ndërsa në terren kanë qenë të angazhuara ekipet mjeko-ligjore të Institutit për Mjekësi Ligjore (IML), përfshirë ekspertët e EULEX-it.
Gërmimet e 27 tetorit janë vazhdimësi e aktiviteteve vlerësuese të nisura në këtë lokacion më 20 tetor 2026.
Sipas njoftimit, veprimet janë ndërmarrë në zbatim të urdhrit të Gjykatës, pas kërkesës së iniciuar nga Drejtoria e Policisë për Hetimin e Krimeve të Luftës, përmes Prokurorisë, përkatësisht Departamentit për Krime Lufte.
Mbetjet mortore të gjetura dhe të zhvarrosura janë dërguar në Institutin për Mjekësi Ligjore, ku do t’u nënshtrohen ekzaminimeve të nevojshme mjeko-ligjore, përfshirë analizat e ADN-së, me qëllim të përcaktimit të identitetit.
Megjithatë, deri në përfundimin e ekzaminimeve, nuk është konfirmuar identiteti i mbetjeve mortore dhe as nëse ato u përkasin personave të zhdukur gjatë luftës.
Komisioni Qeveritar për Persona të Zhdukur, në bashkëpunim me Institutin për Mjekësi Ligjore, Drejtorinë e Policisë për Hetimin e Krimeve të Luftës dhe institucionet e tjera të angazhuara, ka theksuar përkushtimin për trajtimin me prioritet të çdo informacioni që mund të ndihmojë në ndriçimin e fatit dhe vendndodhjes së personave të zhdukur me dhunë gjatë luftës në Kosovë.
