Kryeministri Albin Kurti ka takuar Nikol Pashinyan, homologun e tij nga Armenia, një shtet që nuk e njeh Pavarësinë e Kosovës.
Takimi është zhvilluar të martën në Paris të Francës, ku kreu i qeverisë kosovare po realizon një vizitë zyrtare.
Dy liderët kanë diskutuar mundësitë për zhvillimin e mëtejmë të marrëdhënieve ndërmjet dy vendeve, thuhet në një njoftim për media të Zyrës së Kryeministrit të Armenisë, raporton Paparaci.
Sipas njoftimit, Kurti e Pashinyan kanë theksuar rëndësinë e zgjerimit të tregtisë dhe lidhjeve ekonomike.
“U diskutua gjithashtu për bashkëpunimin në fushën e turizmit, duke vënë në pah potencialin e konsiderueshëm për thellimin e mëtejshëm të bashkëpunimit në këtë sektor”, thuhet në njoftim.
Palët shkëmbyen gjithashtu pikëpamje për çështjet rajonale, përfshirë mundësitë që po krijohen si rezultat i vendosjes së paqes mes Armenisë dhe Azerbajxhanit.
Armenia, një shtet në rajonin e Kaukazit Jugor, nuk e njeh Pavarësinë e Kosovës kryesisht për shkak të konfliktit të saj historik me Azerbajxhanin rreth Nagorno-Karabakut dhe implikimeve që rasti i Kosovës mund të ketë pasur për atë konflikt. Ajo druhej se njohja e pavarësisë së Kosovës mund të përdorej si precedent ndërkombëtar për kërkesat e pavarësisë së Nagorno-Karabakut.
Kjo çështje ishte veçanërisht e ndjeshme në vitin 2008, kur Kosova shpalli pavarësinë.
Megjithatë, 16 vjet pas shpalljes së Pavarësisë së Kosovës, në vitin 2024, Armenia njohu pasaportën e Kosovës. Ky vendim hapi një kapitull të ri në marrëdhëniet ndërmjet dy vendeve.
Kurti realizoi vizitë historike, të parën të një kryeministri të Kosovës në Yerevan të Armenisë në muajin maj të këtij viti. Gjatë kësaj vizite, kryeministri kosovar ishte pritur në takim zyrtar nga homologu i tij Pashinyan, por pa prezencën e flamurit dhe simboleve shtetërore të Kosovës.
Armenia ndodhet në një pozitë të ndërlikuar gjeopolitike, e ndikuar nga konflikti i gjatë me Azerbajxhanin, marrëdhëniet e tensionuara me Turqinë dhe dilemat rreth orientimit të saj mes ShBA-ve dhe Rusisë.
