Kryeministri në detyrë, Albin Kurti, fitues i zgjedhjeve të fundit parlamentare, u ka bërë ftesë partive opozitare për të diskutuar çështjen e zgjedhjes së presidentit.
Pasditen e sotme, duke filluar nga ora 15:00, PDK dhe LDK kanë zhvilluar mbledhje në selitë e tyre përkatëse, ku pritet të shqyrtojnë qëndrimin lidhur me ftesën e Kurtit dhe zhvillimet e fundit politike.
Deri më tani, nuk është bërë e ditur nëse partitë opozitare do t’i përgjigjen pozitivisht ftesës për takim.
Ftesën për opozitarët Kurti e kishte paralajmëruar, duke thënë se do ta bëjë porsa KQZ-ja të përmbyllë procesin e numërimit me certifikim të rezultatit zgjedhor të 7 qershorit.
Nga ana tjetër, ushtruesja e detyrës së presidentes, Albulena Haxhiu, bëri me dije se seanca për konstituimin e Kuvendit do të thirret brenda afatit që përcakton Kushtetuta.
“Në përputhje me përgjegjësitë kushtetuese, seanca konstituive e Kuvendit të Republikës do të thirret brenda afatit të përcaktuar me Kushtetutë, duke hapur rrugën për themelimin e institucioneve të reja të dala nga vullneti i qytetarëve”, ka shkruar Haxhiu në Facebook.
