Kryeprokurori i Prokurorisë Speciale, Blerim Isufaj, i është kundërpërgjigjur kritikave të kryeministrit në detyrë, Albin Kurti, i cili e ka përmendur plot herë me emër gjatë deklarimeve të tij, duke e akuzuar për punën e tij si prokuror.
Isufaj u shpreh se nuk dëshiron të komentojë nivelin e sulmeve politike, por e pati një përgjigje të prerë.
“Shiko… nivel i ulët më duket me e komentu këtë. Por, vetëm një gjë dua me thanë. Në karrierën time prej vitit 2010 jam prokuror, dhe vazhdimisht kam qenë prokuror i Krimeve të Rënda ose i Prokurorisë Speciale. Për mos me ekzagjeru, për këto vite i kam ngritur diku 300 aktakuza. Me dijeninë time, vetëm 6 i kam të refuzuara gjatë karrierës. Që performanca i bie diku 97% aktakuza të aprovuara në gjykatë. Kjo është lehtë e verifikueshme” – tha ai.
“As që më intereson nëse e din apo jo. Unë jam i sigurt se ai nuk shërbehet me fakte, por me thashetheme. Sepse po të shërbehej me fakte, ai nuk do të duhej të thoshte ashtu. Mos e harro një fakt – a folëm më herët për terrorizëm – unë kam qenë ai që i ka arrestu 40 e më shumë persona, unë kam qenë ai që i kam akuzu mbi 30, krejt janë të dënuar. Ky është një fakt në mesin e shumë fakteve të tjera.” – tha ai në KallxoPërnime.
Ndërsa sa i përket kritikave se nuk është marrë me korrupsion apo hetime të nivelit të lartë, ai tha se Prokuroria Speciale ka ngritur aktakuza edhe ndaj ish-zyrtarëve të lartë qeveritarë.
“Nuk kanë të drejtë ta thonë këtë gjë. Ju e dini – pesë ish-ministra të qeverive të kalume i kemi me aktakuzë. Ne i prezumojmë të pafajshëm, por sipas bindjes sonë, ata kanë plotësuar standardet për t’u akuzuar. Ka edhe zëvendëskryeministër, është i akuzuar edhe ish-drejtori i AKI-së. Këta kurrë nuk janë pjesë e kësaj qeverie, sikur tentohet shpesh me thanë se po na hetoni vetëm neve,” – përfundoi Isufaj.
