KFOR-i zhvillon ushtrim për viktima masive

Personeli i Komandës Rajonale Lindje (RC-E) të KFOR-it, së bashku me partnerët shumëkombësh dhe zjarrfikësit e kampit “Bondsteel”, zhvilluan një ushtrim për viktima masive.

KFOR-i bën me dije se ushtrimi testoi aftësinë e pjesëmarrësve për t’iu përgjigjur një incidenti me viktima masive, për të ofruar trajtim mjekësor emergjent dhe për të koordinuar evakuimin e viktimave, duke përfshirë transportin e pacientëve të simuluar në një helikopter UH-60 Black Hawk.

“Ushtrimi u përqendrua në koordinimin dhe ndërveprimin midis personelit të KFOR-it dhe ndihmësve të emergjencave, duke mbështetur gatishmërinë e tyre për t’iu përgjigjur situatave emergjente” thuhet në njoftim.

KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit që jetojnë në Kosovë.