Izraeli i dërgon paralajmërim të fortë Libanit: Çarmatose Hezbollahun ose do ta paguash çmimin

Ministri izraelit i Mbrojtjes, Israel Katz, paralajmëroi të shtunën presidentin libanez, Joseph Aoun, se Libani do të “paguajë çmimin” për mosveprimin në çarmatosjen e Hezbollahut.

Në një deklaratë televizive drejtuar presidentit Aoun, Katz tha se Libani kishte “bërë një premtim dhe angazhim për të ndjekur marrëveshjen dhe për të çarmatosur Hezbollahun”, raporton CNN.

“Nëse duhet të zgjedhim midis mbrojtjes së civilëve dhe ushtarëve tanë ose shtetit të Libanit, ata që do të paguajnë çmimin do të jenë qeveria libaneze dhe i gjithë Libani”, tha Katz.

Pas zgjedhjes së Aounit në janar 2025, ai u zotua të rivendoste monopolin e ushtrisë libaneze mbi armët në vend duke çarmatosur Hezbollahun. Megjithatë, grupi militant ka vazhduar veprimet dhe nisi një sulm ndaj Izraelit javën e kaluar, pas sulmeve të përbashkëta SHBA-Izrael ndaj Iranit.

Si përgjigje, Izraeli ka nisur sulme të fuqishme në të gjithë Libanin, duke synuar Hezbollahun jo vetëm në jug, por edhe në kryeqytet, Bejrut, dhe në Tripoli në veri. I pyetur për mundësinë e një pushtimi tokësor në shkallë të gjerë, një zëdhënës ushtarak izraelit tha: “Të gjitha opsionet mbeten në tryezë.”

Katz shtoi se Izraeli nuk ka “asnjë pretendim territorial” në Liban, por theksoi: “ne nuk do të pranojmë zjarr nga territori libanez drejt Izraelit”.

“Prandaj, ne ju drejtohemi dhe ju paralajmërojmë – bëni diçka dhe veproni përpara se të bëjmë edhe më shumë”, përfundoi Katz në mesazhin e tij drejtuar presidentit Aoun.