Kjo nismë u mirëprit si një hap i rëndësishëm për përmirësimin e lidhjeve ndërkombëtare të vendit dhe lehtësimin e qarkullimit të udhëtarëve drejt Francës dhe më gjerë në Europë.
Në ceremoninë zyrtare, zëvendësministri në detyrë i Mjedisit, Planifikimit Hapësinor dhe Infrastrukturës, Jeton Raka, tha se ky zhvillim është një dëshmi e qartë e përkushtimit të institucioneve për modernizimin dhe avancimin e infrastrukturës ajrore në Kosovë.
“Përmes investimeve prej mbi 33 milionë euro, që kanë sjellë përmirësime të dukshme në infrastrukturë dhe shërbime: zgjatjen e pistës, sistemin më të avancuar të aterimit (ILS CAT IIIb), rritjen e numrit të pasagjerëve dhe fluturimeve, si dhe uljen e çmimeve të biletave” tha Raka.
Sipas njoftimit thuhet se në këtë ngjarje morën pjesë edhe Drejtori Ekzekutiv i Aeroportit, Gökhan Acikgöz, Drejtori Komercial i ASL Airlines, Bruno Besnehard, Ambasadori i Francës në Kosovë, Olivier Guérot, dhe Ambasadori i Kosovës në Francë, Mehdi Halimi, duke e bërë këtë një moment të përbashkët suksesi dhe bashkëpunimi mes institucioneve, partnerëve dhe pasagjerëve.
