Edhe Apeli lë në paraburgim gjyqtarin Avdirrahman Gashi, dyshohet për keqpërdorim të detyrës

Gjykata e Apelit ka vërtetuar aktvendimin e Gjykatës Themelore në Prishtinë, me të cilin gjyqtarit Avdirrahman Gashit iu caktua masa e paraburgimit nën dyshimin për veprën penale “Keqpërdorimi i pozitës apo autoritetit zyrtar”.

“REFUZOHET, si e pabazuar ankesa e mbrojtësit të të pandehurit Avdirrahman Gashi av.Halit Shaljani, ndërsa aktvendimi i Gjykatës Themelore në Prishtinë- Departamenti Special.. i datës 15.08.2026, vërtetohet”, thuhet në vendimin e 21 gushtit 2026.

Vendimi i Apelit është marrë nga kolegji i përbërë prej Vaton Durgutit- kryetar dhe anëtarëve Mentor Bajraktari dhe Valon Kurtaj.

Gjykata Themelore në Prishtinë, Departamenti Special më 15 gusht 2026 kishte caktuar masën e paraburgimit prej një muaji ndaj Gashit.

Avdirrahman Gashi u arrestua më 14 gusht 2026 nga Prokuroria Speciale, në bashkëpunim me Njësinë e Veçantë Hetimore të Policisë së Kosovës, pas një hetimi që, sipas autoriteteve, kishte zgjatur disa muaj.

Prokuroria Speciale ka deklaruar se ndaj tij ekziston dyshimi i arsyeshëm për përfshirje në veprën penale “Keqpërdorimi i detyrës zyrtare”. /BetimipërDrejtësi