E goditi me thikë, kërkohet paraburgim për të dyshuarin për tentim-vrasje dhe armëmbajtje pa leje në Mitrovicë

Prokuroria Themelore në Mitrovicë ka kërkuar nga Gjykata Themelore caktimin e masës së paraburgimit ndaj të dyshuarit me inicialet B.R., i cili dyshohet për veprat penale “Vrasja në tentativë” dhe “Mbajtja në pronësi, kontroll ose posedim të paautorizuar të armëve”.

Sipas Prokurorisë, ngjarja ka ndodhur më 18 korrik 2025, kur i dyshuari, me qëllim që ta privojë nga jeta, e ka sulmuar të dëmtuarin me inicialet B.M. duke e goditur me thikë në kokë, në anën e majtë të brinjëve dhe prapa kraharorit.

Si pasojë e sulmit, viktima ka pësuar lëndime të rënda trupore dhe po trajtohet në Klinikën e Kirurgjisë Torakale në Qendrën Klinike Universitare të Kosovës (QKUK).

I dyshuari është arrestuar më 18 korrik dhe, me vendim të prokurorit, ndodhet në ndalim, ndërsa Prokuroria ka kërkuar caktimin e paraburgimit ndaj tij.