Deputetja e LDK-së reagon pas vdekjes së katër punëtorëve: Koha për përgjegjësi institucionale

Përmes një postimi në Facebook ajo ka shprehur ngushëllimet më të sinqerta për familjet e viktimave dhe ka kërkuar përgjegjësi institucionale.

“Shpreh ngushëllime të sinqerta për familjet e katër punëtorëve që kanë humbur jetën në vendin e punës gjatë javës së fundit,” deklaroi Bajrami, duke theksuar se kjo situatë është alarmante dhe kërkon veprim të menjëhershëm.

Ajo shtoi se pa dëshirën për ta politizuar këtë çështje, është detyrim moral dhe qytetar që të ngritët zëri për sigurinë e punëtorëve në Kosovë.

“Secili prej nesh duhet të ndjejë përgjegjësi për gjendjen në të cilën ndodhen punëtorët në Kosovë, për pasigurinë dhe rrezikun që i shoqëron çdo ditë kur nisen për në punë,” u shpreh ajo.

Bajrami u bëri thirrje të gjitha institucioneve përgjegjëse që të marrin masa konkrete dhe të mos lejojnë që tragjeditë të përsëriten.

“U bëj thirrje të gjitha institucioneve të Republikës, përfshirë inspektoratet shtetërore dhe komunale, si dhe Prokurorinë, që të veprojnë menjëherë. Duhet të mbajnë përgjegjës të gjithë ata që kanë dështuar të ndërmarrin masa për të parandaluar këto tragjedi”, ka deklaruar deputetja.

Bajrami theksoi rëndësinë e drejtësisë dhe nevojën për masa parandaluese.

“Jeta nuk kthehet, por institucionet kanë për detyrë ligjore dhe morale të parandalojnë raste të tilla dhe të sigurojnë që kushdo që nuk vepron sipas ligjit të përballet me drejtësinë”, ka thënë Bajrami.