Del para gjykatës i dyshuari për krime lufte në Skenderaj, Dejan Peleviq

Të enjten ka dalë para Gjykatës, Dejan Peleviq, i dyshuar për krime lufte në komunën e Skenderajt.

Prokuroria Speciale ka kërkuar nga Gjykata Themelore në Prishtinë, caktimin e masës së paraburgimit prej 1 muaji, ndaj të dyshuarit Peleviq.

I dyshuari Peleviq në hetimet e zhvilluara dyshohet se në cilësinë e pjesëtarit të MUP-it të Serbisë gjatë periudhës së luftës në Kosovë, i sistemuar në Stacionin Policor të Skenderajt, i uniformuar dhe i armatosur, në mars të vitit 1999 në Skenderaj në bashkëkryerje edhe me pjesëtarë të tjerë, të organizuar si grup, kanë marr pjesë në operacion policor-ushtarak, ku kanë bërë dëbimin me dhunë të civilëve nga pronat e tyre, kanë rrahur, torturuar, plagosur dhe privuar nga jeta 15 civilë shqiptarë, si dhe zhdukur 16 civilë të tjerë në dy lokacione në Skënderaj.

Ai u arrestua të martën në Soqanicë të Leposaviqit.