Dëshmitari James Covey ka deklaruar se ish-presidenti Hashim Thaçi nuk ishte një person i dhunshëm dhe as nuk kishte predispozita të tilla. Përkundrazi, sipas tij, Thaçi iu trembej komandantëve të UÇK-së që ishin famëkeq për dhunë.
Por, kur u pyet nga gjyqtari Christoph Barthe, Covey tha se ishte e qartë që edhe në Rambuje, Thaçi kishte frikë nga komandantët e zonave, ku kishte marrë kërcënime të drejtpërdrejta, raporton “Betimi për Drejtësi“.
“Që trembej është e qartë edhe në Rambuje që ai është kërcënuar drejtpërsëdrejti që nëse ai nuk pajtohej me kërkesat e komandantëve të zonave. Por, ishte edhe sjellja e tij e qartë. Mënyra se si ishte i kujdesshëm sa i takon marrëdhënieve me udhëheqjen e lëvizjes së UÇK-së. Siç e thash edhe më herët në profesionin tonë ne nuk kemi qasje asnjëherë në informacione të plota. Ne, thjesht nxjerrim përfundime nga çka kemi parë, çka kemi dëgjuar dhe bazuar në përvojën tonë jetësore”, tha ai.