CNN: Korea e Veriut ka një bazë sekrete raketash që paraqet “kërcënim bërthamor të mundshëm” për SHBA-në

Korea e Veriut ka një bazë sekrete të raketave pranë kufirit të saj verior me Kinën, e cila mund të paraqesë një “kërcënim bërthamor të mundshëm” për pjesën më të madhe të Azisë Lindore dhe Shtetet e Bashkuara, sipas një raporti të ri të publikuar të mërkurën, shkruan CNN.

Baza e raketave Sinpung-dong ndodhet vetëm 27 kilometra nga kufiri me Kinën. Besohet se ruan deri në nëntë raketa balistike ndërkontinentale (ICBM) me kapacitet bërthamor si dhe lëshuesit e tyre mobilë, tha raporti i think tank-ut me qendër në Washington, Center for Strategic and International Studies (CSIS).

Sipas raportit, kjo bazë është një nga 15 deri në 20 bazat e raketave balistike dhe objektet e ruajtjes së kokave bërthamore që Koreja e Veriut nuk i ka deklaruar kurrë. Raporti është mbështetur në analizën e imazheve satelitore, intervista me refugjatë dhe zyrtarë nga Koreja e Veriut, dokumente të deklasifikuara dhe të dhëna të burimeve të hapura.

“Këto raketa paraqesin një kërcënim bërthamor të mundshëm për Azinë Lindore dhe Shtetet e Bashkuara kontinentale”, paralajmëroi raporti.

Koreja e Veriut e ka përshpejtuar programin e saj të armëve gjatë viteve të fundit nën udhëheqësin Kim Jong Un, duke modernizuar me shpejtësi forcat e saj të armatosura, duke zhvilluar armë të reja dhe duke testuar raketa balistike ndërkontinentale që mund të arrijnë pothuajse kudo në Shtetet e Bashkuara.

Këto veprime përbëjnë shkelje të sanksioneve të Kombeve të Bashkuara, të cilat kufizojnë rreptësisht qasjen e Koresë së Veriut në materiale dhe armë. Por shteti i izoluar gjithashtu ka rritur bashkëpunimin e tij me Rusinë që nga pushtimi i Ukrainës nga Moska, duke dërguar trupa për të luftuar në vijën e parë – duke ngritur frikën se Moska mund të ndihmojë në përmirësimin e teknologjive dhe linjave të furnizimit të Phenianit në këmbim.

Kjo bazë sekrete është pjesë e përpjekjeve të Koresë së Veriut për ta forcuar programin e saj bërthamor, tha raporti.

Baza ndodhet në një luginë të ngushtë malore, e prerë përgjysmë nga një përrua, dhe ka sipërfaqe 22 kilometra katrorë (rreth 5,436 hektarë) – më e madhe se Aeroporti Ndërkombëtar John F. Kennedy i New Yorkut.

Ekspertët thonë se vendndodhja e saj pranë kufirit i jep një avantazh gjeografik – vende si Shtetet e Bashkuara mund të hezitojnë ta shënjestrojnë atë pasi çdo ndotje radioaktive mund të ndikojë në Kinën fqinje.