Buja përkujton heroin Rexhep Bislimi dhe dëshmorin Kadrush Ilazi: Përulemi me respekt të pafund para veprës së tyre

Shukri Buja nga PDK ka bërë sot homazhe tek varrezat e heroit të Kosovës, Rexhep Bislimi, dhe dëshmorit Kadrush Ilazi, shkruan GazetaDemos.

Në 28-vjetorin e rënies së tyre, Buja zgjodhi fjalë të mira për heroin Rexhep Bislimi duke theksuar heroizmin e tij në kohët e vështira për vendin tonë.

“Kanë kaluar 28 vjet nga rënia heroike e Rexhep Bislimit, njërit prej veprimtarëve, organizatorëve dhe luftëtarëve të parë të Ushtrisë Çlirimtare të Kosovës, komandantit të njësitit të Ferizajt në fillet e luftës çlirimtare. Ai zgjodhi rrugën më të vështirë, rrugën e sakrificës për lirinë e atdheut, duke e vulosur me gjakun e tij idealin për një Kosovë të lirë dhe të pavarur”, shkroi Buja.

Postimi i plotë:

Sot, me nderimin dhe përulësinë më të thellë, bëra homazhe pranë varreve të Heroit të Kosovës, Rexhep Bislimi, dhe dëshmorit Kadrush Ilazi.

Kanë kaluar 28 vjet nga rënia heroike e Rexhep Bislimit, njërit prej veprimtarëve, organizatorëve dhe luftëtarëve të parë të Ushtrisë Çlirimtare të Kosovës, komandantit të njësitit të Ferizajt në fillet e luftës çlirimtare.

Ai zgjodhi rrugën më të vështirë, rrugën e sakrificës për lirinë e atdheut, duke e vulosur me gjakun e tij idealin për një Kosovë të lirë dhe të pavarur.

Liria që e gëzojmë sot nuk erdhi si dhuratë. Ajo u fitua me gjakun e dëshmorëve, me sakrificën e heronjve dhe me qëndresën e popullit tonë. Prandaj, kujtimi për ta nuk është vetëm detyrim moral, por amanet që duhet ta ruajmë e ta përcjellim brez pas brezi.

Përulemi me respekt të pafund para veprës së Rexhep Bislimit, Kadrush Ilazit dhe të gjithë atyre që dhanë jetën për atdhe.

Lavdi e përjetshme Heroit të Kosovës Rexhep Bislimi!

Lavdi dëshmorit Kadrush Ilazi!

Lavdi të gjithë dëshmorëve dhe heronjve të kombit!