Ushtruesi i Detyrës së Kryeprokurorit të Shtetit, Besim Kelmendi në një konferencë të jashtëzakonshme ka reaguar pas raportimit nga portali “Paparaci” se Kelmendi është ftuar të intervistohet në cilësinë e dëshmitarit për masakrën e Reçakut, një lëndë për krime lufte të cilën e ka nën hetim Prokuroria Speciale.
Kelmendi pas intervistimit nga Prokuroria prezantoi prova se nuk kishte të bënte me rastin për të cilin po raportohet.
Derisa shtoi se për shkak të sigurisë e ka përdorur edhe një emër tjetër.
“Në atë kohë për çdo gjë që i duhet UCK jam unë ai që i kam mbajtur jo vetëm te informuar por kam rrezikuar punën dhe jetën duke marrë dosje për të dërguar aty ku e kishin vendin. Për të parë se çfarë po ndodhë aty deri te gjykata e Hagës. Unë për shkak të sigurisë në atë kohë kam vepruar me emrin Alban Lumi për herë të parë po e foli këtë publikisht, kam mendu që shumë njerëz nuk kanë nevojë me dëgju për fat të keq jeta paparazi armiku im në këtë rast me te pavërteta po ngrit dilemat e njerëzve të cilët nuk më njohin dhe kam qenë i detyruar të dal sot para jush”.
Ai ka thënë se kundër tij deklarimet e bën pasi ai ka kërkuar të respektohen ligjet dhe procesi për anëtarë të rinj në Këshillin Prokurorial të Kosovës (KPK).
“Unë kam njoftuar kolegjiumin e kësaj Prokurorie, KPK-në për të gjitha tendencat që dikush brenda sistemit dëshiron me çdo kusht me u bë ushtrues detyra i Kryeprokurorit të shtetit. Në momentin kur them që duhet të respektohet ligji, dhe procesi për anëtar të rinj në KPK e shihni çka ndodhë, aktivizohet Vehbi Kajtazi. Me shpifje e të zeza që janë veç kulturë e tij. Goditja kaq e ulët që është bërë, nuk i takon një njeriu e as njerëzve që i takojnë qenies njerëzore. Që tre vite kam paraqitur padi në Gjykatën Themelore të Prishtinës kundër këtij portali. Për fatin tim të keq dhe shumë qytetarëve të KOSOVËS që nuk marrin thirrje. Askush nuk më ka thirrë për këtë padi që e kam paraqit në gjykatë, shpresoj që një ditë gjykata do ta thotë atë që unë konsideroj që është e drejtë”, tha ai.
