Kandidati i LDK-së për kryetar të Gjilanit, Arbër Ismajli, ka reaguar pas mungesës së tij në një debat publik për shkak të arsyeve shëndetësore familjare, shkruan Gazeta Demos.
Ai ka kritikuar kundërshtarët politikë për, siç tha, “festimin mbi fatkeqësitë e njerëzve” dhe përdorimin e situatave shëndetësore për përfitime politike.
Ismajli e ka cilësuar këtë si “nivelin më të ulët të mendësisë politike” dhe “shpurdhjen e fundit të pushtetit aktual”, duke theksuar se qytetarët e Gjilanit nuk e meritojnë një qasje të tillë.
“LDK-ja dhe unë ofrojmë një standard tjetër, një politikë me fytyrë njerëzore. Fitoren e duam për të mirën e përbashkët, për drejtësinë dhe dinjitetin e qytetarëve tanë,” tha Ismajli.
Ai shtoi se vizioni i tij dhe i ekipit të tij mbështetet mbi humanizmin, edukatën dhe dashurinë për njeriun, duke u zotuar se çdo hap i tyre do të jetë në shërbim të qytetarëve me sinqeritet, drejtësi dhe zemër.
“Bashkë do ta fitojmë betejën për ndryshim. Bashkë do ta sjellim fitoren që e meriton Gjilani,” përfundoi kandidati i LDK-së për kryetar të Gjilanit.
