Dogana e Kosovës, falë kapaciteteve të avancuara teknologjike dhe profesionalizmit të zyrtarëve doganorë, ka zbuluar një sasi të konsiderueshme armësh gjatë kontrollit dhe skanimit të një automjeti të tipit VW Caddy, me targa të huaja.
Gjatë kontrollit, përmes pajisjeve skanuese të Doganës së Kosovës, janë identifikuar dhe zbuluar:
42 pushkë automatike të tipit AK-47 (Kallashnikov);
1 pushkë e tipit Walther, kalibër 12 mm;
41 karikatorë për armë të tipit AK-47.
Zbulimi është rezultat i vigjilencës, përkushtimit dhe profesionalizmit të stafit doganor, si dhe përdorimit efikas të pajisjeve moderne të kontrollit dhe detektimit me të cilat disponon Dogana e Kosovës.
Pas identifikimit të ngarkesës, rasti është trajtuar në bashkëpunim dhe koordinim të ngushtë me Policinë e Kosovës dhe institucionet kompetente të drejtësisë, në përputhje me procedurat ligjore në fuqi.
Dogana e Kosovës shpreh mirënjohje të veçantë për mbështetjen e vazhdueshme të Shteteve të Bashkuara të Amerikës dhe Ambasadës së SHBA-së në Kosovë, përmes së cilës janë fuqizuar kapacitetet teknologjike dhe operative të institucionit, përfshirë pajisjet skanuese që kanë luajtur rol të rëndësishëm në këtë zbulim.
Dogana e Kosovës mbetet e përkushtuar në luftimin e kontrabandës, trafikimit të armëve, narkotikëve dhe çdo forme tjetër të veprimtarisë së kundërligjshme, duke shfrytëzuar kapacitetet profesionale, teknologjike dhe bashkëpunimin ndërinstitucional për të garantuar sigurinë e vendit dhe mbrojtjen e qytetarëve
