“17 cent një minutë” Telekomi sqaron pse rriti çmimet e telefonisë brenda burgjeve të Kosovës

Të burgosurve në Kosova u është shtrenjtuar ndjeshëm komunikimi telefonik, pasi Telekomi i Kosovës ka kaluar nga një pagesë fikse mujore në tarifim për minutë, duke rritur koston deri në rreth 17 cent për minutë me TVSH

Deri para rreth dy muajsh, të burgosurit kishin mundësi të komunikonin me familjarët përmes një pagese fikse prej 5 eurosh në muaj. Por, me ndryshimin e sistemit, tani tarifimi bëhet për çdo minutë të shpenzuar në telefon.

Në një përgjigje për media, Telekomi i Kosovës ka arsyetuar rritjen me investimet teknologjike dhe rikthimin në një sistem standard të faturimit.

Sipas kompanisë, forma e mëparshme me pagesë fikse ishte një zgjidhje e përkohshme, pasi mungonin kapacitetet teknike për të monitoruar kohëzgjatjen e thirrjeve individuale.

“Për rikthimin e shërbimit standard, ka qenë e nevojshme të realizohen investime teknologjike, përfshirë ndërrimin e platformës dhe instalimin e kabinave të reja”, thuhet në arsyetimin e Telekomit.

Pas përfundimit të këtyre investimeve, shërbimi është rikthyer në sistemin standard përmes kartelave, ku tarifimi bëhet për minutë.

“Thirrjet brenda rrjetit (Vala): 6.8 cent + TVSH (~8.02 cent) për minutë. Thirrjet drejt operatorëve të tjerë në Kosovë: 12.7 cent + TVSH (~15 cent) për minutë. Për klientë standardë, tarifat arrijnë deri në 14.4 – 15.25 cent + TVSH. Thirrjet jashtë Kosovës tarifohen sipas çmimeve standarde të tregut.

Reagimet e familjarëve

Rritja e çmimeve ka shkaktuar reagime të forta nga familjarët e të burgosurve, të cilët e konsiderojnë këtë barrë të papërballueshme.

Ilir Qerimi, familjar i një të burgosuri, e ka cilësuar këtë si cenim të një të drejte themelore.

“Veçanërisht shqetësuese është fakti që shërbimet ofrohen nga operatori shtetëror VALA, ndërkohë që në tregun e lirë qytetarët për një shumë më të ulët përfitojnë paketa shumë më të favorshme”, ka shkruar ai në ankesën drejtuar institucioneve.

Sipas ankesave, sistemi i ri e bën komunikimin shumë më të kushtueshëm, sidomos për të burgosurit që nuk kanë të ardhura të rregullta.

Lidhur me këtë, Ministria e Drejtësisë dhe Shërbimi Korrektues i Kosovës i ka thënë Insajderit se kabinat telefonike menaxhohen nga Telekomi i Kosovës dhe se çmimet përcaktohen nga vetë kompania.

“Kabinat telefonike të vendosura në institucionet korrektuese menaxhohen nga Telekomi i Kosovës. Kabinat e vjetra telefonike, për shkak të zhvillimeve dhe ndryshimeve teknologjike, janë zëvendësuar nga Telekomi me kabina të reja me teknologji të avancuar. Çmimet e tarifave përcaktohen nga vetë kompania që ofron këto shërbime”, thuhet në përgjigjen e ministrisë.