Trajneri i Juventusit ankohen për “kushtet e vështira atmosferike” në Floridë: Lojtarët ishin shumë të lodhur

Trajneri i Juventusit, Igor Tudor, ka shprehur shqetësimin për kushtet e vështira të motit në Floridën Jugore, pas eliminimit të skuadrës nga Real Madridi në një të tetën e finales së Kupës së Botës për Klube.

Juventusi u mposht nga Real Madridi me rezultatin 1:0 të martën, në një ndeshje që filloi në orën 3:00 pasdite, sipas kohës lokale, kur temperatura ishte 30 gradë Celsius dhe lagështia 70% në stadiumin “Hard Rock”.

Tudor e pranoi se kushte të tilla ndikuan në performancën e skuadrës. “Luajtëm në kushte vërtet të vështira. Lojtarët ishin shumë të lodhur,” tha ai.

Trajneri kroat shtoi se gjatë ndeshjes, dhjetë lojtarë kërkuan zëvendësim për shkak të lodhjes së madhe. Po ashtu, ai theksoi se shumë faktorë ndikuan në eliminimin e Juventusit.

“Është fundi i edicionit. Lojtarët kishin shumë stres, gjë që u merr energji. Pastaj, nxehtësia i bën gjërat më të vështira,” tha Tudor.