“Nuk po luan në nivelin e duhur”, ish-lojtari i Zvicrës për Ardon Jasharin

Blerim Xhemaili ka folur edhe për Ardon Jasharin, duke shprehur bindjen se mesfushori shqiptar do të arrijë të afirmohet si te Kombëtarja e Zvicrës, ashtu edhe te Milani.

Në një intervistë për Blick.ch, Xhemaili ka pranuar se Jashari aktualisht nuk është në nivelin e paraqitjeve të tij të mëparshme, ndërsa ka theksuar se te Milani po e ka të vështirë të fitojë besimin e nevojshëm.

“Për momentin nuk po luan në nivelin që ishte pak më shumë se një vit më parë. Te Milani, aktualisht, e ka të vështirë të fitojë vetëbesimin që i nevojitet. Sipas mendimit tim, ky klub prej vitesh nuk funksionon siç duhet”, ka deklaruar Xhemaili, shkruan Indeksonline.

Megjithatë, ish-reprezentuesi zviceran ka vlerësuar përkushtimin e Jasharit dhe paraqitjen e tij ndaj Maqedonisë së Veriut.

“Ardoni megjithatë po mundohet dhe po përpiqet shumë, jo vetëm te klubi, por edhe këtu me Kombëtaren. Më pëlqeu shumë paraqitja e tij në pjesën e parë ndaj Maqedonisë së Veriut.”

Xhemaili ka theksuar se Jashari nuk duhet të tentojë të zëvendësojë Granit Xhakën, por të fokusohet te loja e tij.

“E rëndësishme është që të mos përpiqet të jetë zëvendësues i Granit Xhakës. Ai duhet të luajë lojën e tij. Shpresoj që Murat Yakin t’i japë tani stabilitet dhe ta aktivizojë edhe në ndeshjet e ardhshme. Do të doja që Ardoni të luante në të katërta ndeshjet.”

Në fund, Xhemaili ka shprehur besim të plotë në cilësitë dhe personalitetin e Jasharit.

“Për cilësitë dhe personalitetin e tij jam ende plotësisht i bindur. Në planin afatgjatë, ai do të afirmohet jo vetëm te Kombëtarja, por edhe te Milani”, u shpreh Xhemaili.