Mourinho nis revolucionin te Real Madridi, vendos rregulla të reja për lojtarët

Jose Mourinho ka nisur të aplikojë filozofinë e tij te Real Madridi, duke sjellë që në ditët e para ndryshime të rëndësishme në mënyrën se si funksionon skuadra.

Sipas raportimeve të “Diario AS”, trajneri portugez ka identifikuar disa zakone që i konsideron të papërshtatshme brenda grupit dhe ka vendosur t’i eliminojë ato përmes një regjimi më të rreptë dhe profesional.

Një nga ndryshimet kryesore ka të bëjë me ushqimin e futbollistëve. Lojtarët nuk do të kenë më liri të plotë për të vendosur se çfarë konsumojnë, pasi nutricionisti i klubit do të ketë rol të drejtpërdrejtë në menaxhimin e dietës së tyre.

Sipas planit të ri, do të hartohen menu të personalizuara për secilin futbollist, në varësi të nevojave dhe kërkesave fizike. Mourinho beson se përgatitja fizike nuk kufizohet vetëm te puna në fushën e stërvitjes, por përfshin edhe mënyrën e ushqyerjes dhe kujdesin ndaj trupit jashtë saj.

Portugezi ka vendosur gjithashtu rregulla të qarta për respektimin e orareve të stërvitjes. Çdo lojtar që vonohet, qoftë edhe për vetëm një minutë, do të përballet me masë disiplinore.

Sipas raportimeve, futbollisti që vonohet në stërvitje do të detyrohet të zhvillojë një seancë individuale në palestër. Mourinho nuk pritet të bëjë përjashtime dhe rregullat do të vlejnë njësoj për të gjithë, pavarësisht emrit apo statusit të lojtarit në ekip.

Një tjetër ndryshim i rëndësishëm lidhet me mënyrën e menaxhimit të dëmtimeve. Futbollistët e lënduar do të duhet ta zhvillojnë procesin e rikuperimit në qendrën stërvitore të klubit, nën mbikëqyrjen e stafit të Real Madridit.

Kjo do të thotë se lojtarët nuk do të lejohen të kryejnë rehabilitimin jashtë ambienteve të klubit, duke punuar me staf të jashtëm, pa mbikëqyrjen e ekipit mjekësor dhe teknik të Real Madridit.

Për Mourinhon, disiplina jashtë fushës, ushqimi, respektimi i orareve dhe mënyra e rikuperimit janë po aq të rëndësishme sa performanca gjatë ndeshjeve. Tani mbetet të shihet nëse ky regjim i ri do të sjellë rezultatet e synuara te Real Madridi.