Robert Lewandowski nuk ka në plan të largohet nga Barcelona, pavarësisht pasigurisë në rritje sa i përket rolit të tij në skuadër dhe situatës kontraktuale.
Sipas “Sport”, sulmuesi 37-vjeçar është i vendosur të qëndrojë në “Camp Nou” dhe të rikthejë peshën e tij në ekip, edhe pse ka humbur statusin e titullarit si numër 9, me Ferran Torres që ka marrë më shumë hapësira në repartin ofensiv.
Lewandowski po hyn në gjashtëmujorin e fundit të kontratës së tij, e cila skadon më 30 qershor, dhe duhet ta bindë klubin për një rinovim. Nga 1 janari, ai ka të drejtë të negociojë lirshëm me klube të tjera, ndërsa interes konkret për të ka nga MLS dhe Arabia Saudite.
Në këtë sezon, polaku ka realizuar tetë gola në La Liga, por ka kaluar rreth një muaj pa shënuar, ndërkohë që problemet fizike janë shfaqur më shpesh. Kjo situatë ka shtuar dilemat brenda klubit lidhur me vazhdimësinë e tij si lider i repartit ofensiv.
Trajneri i Barcelonës, Hansi Flick, po e menaxhon me kujdes ngarkesën e sulmuesit, duke shpresuar që përvoja dhe instinkti i Lewandowskit të jenë vendimtare në pjesën e dytë të sezonit dhe në momentet kyçe.
Megjithatë, nëse Lewandowski nuk arrin të rikthejë ndikimin dhe të riafirmohet si titullar i padiskutueshëm, largimi i tij do të bëhej një opsion realist, duke e detyruar Barcelonën të rishikojë planet për pozitën e sulmuesit qendror.
