Kombëtarja e Kosovës e ka bërë një përparim historik në ranglistën e FIFA-s .
Dardanët e kanë regjistruar pozitën më të mirë ndonjëherë, që prej pranimit në UEFA e në FIFA.
Ekipi i Franco Fodës e sheh veten në pozitën e 91-të duke përparuar për katër pozita.
Verdhekaltrit ishin në vendin e 95-të në renditjen paraprake.
Por, fitorja e madhe ndaj Suedisë i ndihmoi Vedat Muriqin me shokë që ta përmirësojnë pozitën në këtë ranglistë, përkundër humbjes së thellë nga Zvicra.
Kosova i ka 1262.1 pikë, ndërsa gjendet përpara Sirisë dhe prapa El Salvadorit në renditje.
Ndërkohë, përparim në këtë renditje pati edhe Kombëtarja shqiptare, e cila u ngrit për dy pozita.
Trupa e trajnerit Sylvinho tash e sheh veten në vendin e 66-të në krahasim me atë të 68-të sa ishte në muajin e kaluar.
Kuqezinjtë i kanë 1380.66 pikë dhe gjenden përpara Emirateve të Bashkuara Arabe dhe prapa Hondurasit.
Shqipëria e mposhti Gjibraltarin në miqësore në këtë muaj, 1:0 dhe më pas edhe Letoninë me rezultat identik në ndeshjen kualifikuese të Botërorit 2026.
